প্রধান মন্ত্রীনা ভিদিও মেসেজকী খুত্থাংদা মনিপুর সংঙাই ফেস্তিবেলদা ৱা ঙাঙখ্রে
“মনিপুরগী সংঙাই ফেস্তিবেলনা মনিপুর মীয়ামগী ইথিল অমসুং অপাম্বগী মশক তাক্লি”
“মনিপুর অসিদি অপীকপা ভারত অমগী শক্তম উবা ফংবা নিংথিরবা লৈ-পরেং অমনি”
“সংঙাই ফেস্তিবেলনা ভারতকী বাইওদাইবর্সিতীগী নুংঙাইবা ফোংদোক্লি”
“ঐখোয়না মহৌশা ইমা, শা-ঙা অমসুং উ-পাম্বীশিংবু ঐখোয়গী ফেস্তিবেল অমসুং নুংঙাইবা ফোংদোকপগী শরুক ওইহনবা মতমদা, পুম্নমক্কা পুন্না লৈমিন্নবনা ঐখোয়গী পুন্সিগী মহৌশাগী শরুক অমা ওইরকই”
প্রধান মন্ত্রী, শ্রী নরেন্দ্র মোদীনা ঙসি ভিদিও মেসেজকী খুত্থাংদা মনিপুর সংঙাই ফেস্তিবেলদা ৱা ঙাঙখ্রে। রাজ্যসিগী খ্বাইদগী চাউবা ফেস্তিবেল অমনি হায়নরিবা, মনিপুর সংঙাই ফেস্তিবেলনা মনিপুরবু মালেমগী থাক্তা লৈবা তুরিজমগী পন্থুংফম অমা ওইনা মীয়ামদা শক্তাক্লি। ফেস্তিবেল অসি মনিপুরগী রাজ্যগী শা, মনিপুর খক্তদা ফংবা ব্রো এন্তলর্দ দিয়র, সংঙাইগী মমিং লৌদুনা মিংথোনবনি।
ঙসিগী মীয়ামদা প্রধান মন্ত্রীনা ৱা ঙাঙখিবদা, মনিপুরগী মীয়াম্বু সংঙাই ফেস্তিবেল মায় পাক্না শীনবগীদমক্তা থাগৎপা ফোংদোকখি। ফেস্তিবেল অসি কোবিদ লাইচৎনা মরম ওইরগা চহি ২ লেপ্লুরবা মতুংদা পাংথোকপনি হায়না মহাক্না পাউদম্লদুনা ফেস্তিবেল অসিবু য়াম্না চাউনা শীন-লাঙবগী মতৌদা নুংঙাইবা ফোংদোকখি। মনিপুর সরকার অমসুং মুখ্য মন্ত্রী, শ্রী এন. বিরেন সিংহনা ফেস্তিবেল অসিবু শীন-লাঙবদা হোৎনখিবা অমসুং অশানবা মিৎয়েং য়েংবগীদমক্তা থাগৎলদুনা প্রধান মন্ত্রীনা অসুম্না হায়খি, “মনিপুরগী সংঙাই ফেস্তিবেলনা মনিপুর মীয়ামগী ইথিল অমসুং অপাম্বগী মশক তাক্লি”।
মহৌশাগী ফজবা মফম মশিং য়াম্না লৈরিবা, কলচর মশিং য়াম্লিবা অমসুং দাইবর্সিতীগী মতাংদা প্রধান মন্ত্রেনা পাউদম্লদুনা, মীপুম খুদিংনা রাজ্যসিদা অমুক্তং ওইরবসু চৎপা পাম্মি হায়খি অমসুং তোঙানবা মনি-মুক্তানা লেংবা নিংথিরবা লৈ-পরেং অমগা মান্নৈ হায়না মখা তানা ফোংদোকখি। “মনিপুর অসিদি অপীকপা ভারত অমগী শক্তম উবা ফংবা নিংথিরবা লৈ-পরেং অমনি”, হায়না প্রধান মন্ত্রীনা মখা তাখি।
ভারতনা মশাগী অমৃত কাল মনুংসিদা “এক ভারত শ্রেস্থ ভারত”কী ইথিলগা লোয়ননা তুংলমচত্তা খোঙদারি হায়না প্রধান মন্ত্রীনা মরু ওইবা মিৎয়েং চঙখি। “অমত্তগী ওইবগী কুহ্মৈ” হায়রিবা সংঙাই ফেস্তিবেলগী থীমগী মতাংদা পল্লদুনা, প্রধান মন্ত্রীনা ফেস্তিবেল অসিবু মায় পাক্না শীন-লাঙবনা লাক্কদৌরিবা মতমশিংদা লৈবাক্কী পাঙ্গল অমসুং ইথিল লৌফম অমা ওইগনি হায়খি। “সংঙাইনা মনিপুর রাজ্যগী শা ওইবতা নত্তনা, মসিনা ভারতকী থাজবা অমসুং লাইনীংদা অখন্নবা মফম অমসু কল্লি। সংঙাই ফেস্তিবেলনা ভারতকী বাইওদাইবর্সিতীগী নুংঙাইবা ফোংদোক্লি”, হায়না প্রধান মন্ত্রীনা হায়খি। কুহ্মৈ অসিনা ভারতকী নাৎ অমসুং চৎনবীগা মহৌশাগা মরী লৈনবগী মতৌবুসু উৎলি হায়না মহাক্না মখা তাখি। ফেস্তিবেল অসিনা সস্তেনেবল লাইফস্তাইলগী মতাংদা মীয়াম্না খঙদবা য়াবদগী ইথিল অমসু পীরি হায়না প্রধান মন্ত্রীনা পাউদমখি। “ঐখোয়না মহৌশা ইমা, শা-ঙা অমসুং উ-পাম্বীশিংবু ঐখোয়গী ফেস্তিবেল অমসুং নুংঙাইবা ফোংদোকপগী শরুক ওইহনবা মতমদা, পুম্নমক্কা পুন্না লৈমিন্নবনা ঐখোয়গী পুন্সিগী মহৌশাগী শরুক অমা ওইরকই”, মহাক্না হায়খি।
সংঙাই ফেস্তিবেল অসিবু রাজ্যসিগী কোনুং খক্তদা নত্তনা রাজ্যসিগী মফম খুদিংদা পাংথোক্লিবসিদা প্রধান মন্ত্রীনা নুংঙাইবা ফোংদোকখি অমসুং থৌওং অসিনা “অমত্তা ওইবগী কুহ্মৈ”গী ইথিলবুসু হেন্না পাকথোক চাউথোকহল্লি হায়খি। নাগালেন্দদগী ম্যানমার ঙমখৈ ফাওবগী মরক্কী তোঙানবা মফম ১৪দা ফেস্তিবেল অসিগী তোঙানবা মওং-মতৌ অমসুং নুংঙাইবগী মতৌ উবা ফংই হায়না শ্রী মোদীনা হায়খি। মহাক্না মসিগুম্বা থাগৎনীংঙাই ওইরবা থৌওং অসিবু থাগৎলদুনা অসুম্না হায়খি, “ঐখোয়না মসিগুম্বা থৌরমগা মীওই মশিং অয়াম্বগা মরী লৈনহনবা মতমদা, মসিগী তসেংবা মতিক অসি মাঙদা থোক্লকই”।
প্রধান মন্ত্রীনা মহাক্কী ৱারোল লোইশিনবা ওইনা ঐখোয়গী লৈবাক্তা চহি চা-কয়াদগী চৎনদুনা লাক্লবা কুহ্মৈ অমসুং মেলা কয়াগী মতাংদা থমলদুনা মসিনা ঐখোয়গী চৎনবীবু হেন্না ফজহনবগা লোয়ননা ঐখোয়গী লোকেল ইকোনোমীবুসু চাউখৎহল্লি হায়না ফোংদোকখি। সংঙাই ফেস্তিবেলগুম্বা থৌরম্না ইনভেস্তর অমসুং ইন্দস্ত্রী কয়াগী পুক্নিং চিংশিল্লি হায়না মহাক্না মখা তাখি। “ফেস্তিবেল অসিনা তুংগী মতমশিংদা রাজ্যসিগী চাউখৎ-থৌরাংগী মপাঙ্গল লৈবা পাম্বৈ অমা শোইদনা ওইরক্কনি হায়বগী মতিক চানা থাজবা থম্লি”, মহাক্না ৱারোল লোইশিনখি।
Posts
0 Comments
IF YOU HAVE ANY DOUBTS, PLEASE LET ME KNOW